西班牙重奪世盃冠軍！周一(20日)凌晨喺紐約上演嘅王者之戰，「狂牛兵團」憑費倫托利斯攻入關鍵一球，喺加時戰1比0擊敗衞冕嘅阿根廷，繼2010年首次奪冠後，相隔16年再次登上世界之巔。阿根廷難逃衞冕魔咒，「球王」美斯喺世盃嘅「最後一舞」畫上遺憾句號。
西班牙今場沿用4強勝利11人，阿根廷正選就做出3個變動，主角美斯當然擔正，並以39歲零25日之齡成為世盃史上最老在決賽上陣球員。控球力強嘅西班牙順利主導戰局，5分鐘拉明耶馬同丹尼爾奧莫撞牆突破，耶馬近門窄位起腳被阿根廷門將達米安馬天尼斯封出。
警號響起後，阿根廷逼搶更加肉緊，戰況變得膠着。39分鐘西班牙前場快速傳送搓出空位，奧耶沙巴爾射門被馬天尼斯接實，古古列拿之後左路推順起腳貼柱而出；阿根廷中堅利辛度馬天尼斯完半場前傷出，阿根廷上半場捱打，甚至未試過喺西班牙禁區內掂波。
下半場西班牙繼續掌控節奏，製造出多次美妙組織，但最後一擊前被阿根廷瓦解。西班牙愈攻愈入肉，阿歷斯巴爾拿同丹尼爾奧莫都曾有遠射被救出，66分鐘耶馬右路精彩突破後傳中，費倫托利斯頭槌又被接實。
西班牙尾段換入米基爾馬連奴同尼高拉斯威廉斯加強進攻，已成圍攻格局。補時階段耶馬勁射被馬天尼斯擋出，完場前阿根廷中場安素費南迪斯搶波唔收腳，拎到第2面黃牌被逐，耶馬罰球最後一擊又被飛身撲出，令呢場決賽進入加時。
打多個嘅西班牙提高速度，柏迪妙傳尼高拉斯威廉斯頭槌，馬天尼斯橫身撲出。96分鐘西班牙有尼高拉斯威廉斯門前射入，但馬連奴犯規在先被判詐胡。102分鐘馬連奴接應尼高拉斯威廉斯傳中頭槌攻門柱邊出界，錯失黃金機會。
加時下半場一開波，西班牙即搵到缺口，柏度樸路大腳長傳，尼高拉斯威廉斯底線頂番中間，費倫托利斯近門抽入。阿根廷最後力圖反撲，但只靠死球製造混亂，具威脅埋門欠奉，西班牙得以保住勝局，登上世盃冠軍寶座。